Saturday, July 8, 2017

நீரின்றி அமையாது உலகு -பாலை - இயற்கை நோக்குதல்




இக்கொடியை பாருங்களேன்... பார்வையற்ற மாற்றுத்திறனாளியைப்போல் பற்றிக்கொள்ள படலை ஏதும் கிட்டாதா என நெடுந்தூரம் தடவித்தவழ்ந்தலைகிறது.

ஒரு நிமிஷம் இக்கொடியை உற்று நோக்குங்களேன்.

என்ன ஆச்சர்யம்!!! தானே எழும்ப முயல்கிறதே!!!

சரி... நீங்க என்ன நினைக்கிறீங்க?

தனது மெல்லிய உடல் கொண்டு இக்கொடி எழும்பி ஒரு மரமென வளர்தல் சாத்தியமா?

-சத்தியமா சாத்தியமில்லை தானே.

ஏன் இயற்கைக்கு இப்படி ஒரு ஓரவஞ்சனை?

இக்கொடியால் ஒரு மரத்தைப்போலோ, செடியைப்போலோ...குறைந்தபடிச்சம் ஒரு நாணலைப்போலோ ஏன் நிமிர்ந்து நிற்கப் படைக்கப்படவில்லை?

காரணம்...

 “இது படைக்கப்பட்டதல்ல. பரிணமிக்கப்பட்டது.”
------------------------------------------------------------
உங்களது தேவைகளை பட்டியலிடுங்களேன்?

- பெண்களுக்கு சீப்பிலிருந்து சீரியல் வரை நீளும் தேவைகள்.

- ஆண்களுக்கு சரக்கில் தொடங்கி முருக்கு வரை நீளும் தேவைகள்.

- ஆனால் தாவரங்களுக்கோ மூன்றே மூன்று தேவைகள் தாம்.

1.      இருக்க இடம்
2.      குடிக்க நீர்
3.      ஒளிக்கு சூரியன்
-------------------------------------------------------------
குறிஞ்சியும் முல்லையும் நீர் நிறை பிரதேசங்கள். அதனால் அந்நிலத்தில் குடியேற கடும் போட்டி.

money சூழ் மாநகரமாம் சென்னையில் நெருக்கி இருக்கி வசிக்கும் ஒண்டுக்குடித்தனவாசிகள் போலநீர் நிறை இப்பிரதேசத்தில் தாவரங்கள் போட்டியிட்டுக்கொண்டு நெருக்கி இருக்கி வளர்கின்றன.


சரி... நிலத்தை வசப்படுத்தினால் மட்டும் போதுமா?

வெயிலுக்கு???

இங்கே உறுதியாகவும் உயரமாகவும் வளரும் வல்லவர்களால்தான் நிலத்திலே நிலைத்து நிற்கவும், வெயிலிலே வாய் வைக்கவும் முடியும்.
உறுதியாக உயரமாக

அப்ப இது வல்லவர்களுக்கு மட்டுமேயான நிலப்பரப்பா? 

சிறு செடிகள் இங்கே வாழ்வதற்கு வழியேதும் இல்லையா?

- ஏற்கனவே கட்டிமுடிக்கப்பட்ட வீட்டில் குடியேறி, குறுக்கு வழியில் சுருக்கென வெற்றி பெற நினைக்கும் சத்தியராஜைப் போல், குறுக்கு வழி நாடும் சில தாவரங்கள் இங்கே உண்டு.
வெயிலை நோக்கி ஒரு குறுக்குவழிப்  பயணம் 
பல ஆண்டுகள் பாடுபட்டு அடைந்த உயரத்தை பத்தே நாட்களில் அடையும் உத்தி

           இப்ப நீங்களே சொல்லுங்க பாப்பம்...இது படைக்கப்பட்டதா? அல்லது பரிணமிக்கப்பட்டதா என்று ?
----------------------------------
         சரி...இப்ப பல ஆண்டுகளுக்கு மழை பொய்த்துவிட்டதுன்னு வைத்துக்கொள்வோம். எல்லா மரமும் செத்துப்போச்சு. பட்ட மரங்கள் எல்லாம் செல்லரித்து முல்லை இல்லை என்றாகிவிட்டது.

         அந்த இடத்திலே எப்படியோ தப்பிப்பிழைத்த ஒரு கொடி இருக்குன்னு வச்சுக்குங்க. அந்த கொடியானது எதைப்பற்றிக்கொண்டு வளரும்?

       - என்னாத்துக்கு எதையாவது பற்றிக்கொண்டு வளரனும்ங்குறேன்?

       பாழ்பட்ட அந்நிலத்திலே இருக்க இடமும் தகிக்கும் சூரியனும் தான் அபரிமிதமாயிற்றே. அப்படிப்பட்ட ஒரு நிலப்பரப்பில் குடிக்க நீரை மட்டும் சமாளித்தாலே போதுமே, ஜாலியா பரப்பிக்கிட்டு வளரலாமே ?


ஜாலியா பரப்பிக்கிட்டு 

               
           அப்படி சமாளித்து வளரும் தில்லுதுறைகளின் வசிப்பிடம் பேரு என்ன தெரியுமா???

              சிலப்பதிகாரம் என்ன சொல்லுதுன்னா...

“ முல்லையும் குறிஞ்சியும் முறைமையில் திரிந்து நல்லியல்பு இழந்து நடுங்குதுயர் உறுத்துப் பாலை என்பதோர் படிவம் கொள்ளும்”.

         அதாகப்பட்டது... காடாகவுமில்லாமல் மலையாகவுமில்லாமல் இரண்டும் கலந்து மயங்கி வெப்ப மிகுதியால் திரிந்த இடம் தான் பாலை.




எப்புடி பாலை நிலத்த இன்ட்ரட்யூஸ் பண்ணேன் பாத்தீங்களா?

இது மட்டுமா? இன்னும் நெறய ட்விஸ்ட் வச்சுருக்கேன். அத எல்லாத்தையும் தெரிஞ்சுக்க மேல படிங்க...சாரி கீழ படிங்க.
-------------------------------------------------------------
       பாலையெனப்படும் இந்நிலத்திலே தாவரங்களானது வளர்வதில் அப்படியென்ன சவுகரியம் ?

-போட்டியற்ற இந்நிலப்பரப்பிலே புவியீர்ப்புவிசையை எதிர்த்து உயரமாய் வளர்ந்து, வீசும் காத்தை கஷ்டப்பட்டு சமாளித்து நிற்கத்தேவையில்லை.இது எவ்ளோ பெரிய அட்வான்டேஜ் ?


உயரே வளரும் முல்லைவாசி / பக்கவாட்டில் வளரும் பாலை வாசி 
உயர வளரும் அவசியம் இன்றி மல்லாக்கப்படுத்து சூரியன பாக்குறது என்ன சுகம்?
சரி.. இருக்க இடமும் தகிக்கும் சூரியனும் அபரிமிதமென்றாலும் குடிக்க நீருக்கு எங்கு செல்வது?

-மருத நிலத்தில் மரங்கள் வெளிச்சத்தை தேடி மேல் நோக்கி  பயணப்பட்டன. பாலையிலே நீரைத்தேடி கிழ் நோக்கி  பயணப்பட வேண்டும். அம்புடுத்தேய்ன் மேட்டர்.

ஆனா இப்ப பாத்தீங்கன்னா சார்... மேட்டர் அதுமட்டுமல்ல. இன்னும் நெறய சரக்கு பாலையில் இருக்கு. அத்தகைய  சுவாரசியமான முடிச்சுகள் ஒவ்வொன்னையா அவிழ்ப்போமா குழந்தைகளே?
----------------------------------
         வேருக்கு வேண்டிய நீருக்கு ஆழச்சென்று அருந்துவது ஒரு வழியென்றால், சிக்கனமாய் சேமித்து செலவைக்குறைப்பது மற்றுமொரு வழி.

        பாலைவாசிகள் இதில் முனைவர் பட்டம் பெற்றவர்கள்.

       ஆட்சியில் இருக்கும்போதே அமுக்கிவிடும் அரசியல்வாதிகள் போல, பாலைவாசிகள் நீர் இருக்கும்போதே தமக்குள் பதுக்கி கொழுத்துக்கொள்வார்கள்.
        
         பாத்தீங்களா...எப்புடி பதுக்கி வச்சு கொழுத்துருக்காய்ங்கன்னு ?


இப்ப இந்த எடத்துலேருந்து கட் பண்ணி அப்புடியே இமயமலைக்கு போவலாம் வாங்க.
          
         இமயமலையின் இப்பகுதி மருதமென்றாலும், இப்பகுதியிலுள்ள நீர் பயன்படுத்தமுடியாவண்ணம் உறைந்துள்ளது. சோ defenition படி இந்நிலமும் பாலையே. அதனால் தான் இங்கேயுள்ள தாவரங்களும் succulantடாக  நீர் பதுக்கி கொழுத்துள்ளன. yes...அதே டெய்லர்...அதே வாடகை J
    ஆகா!  நீர் கிடைக்கும்போது சேமிக்கும் உத்தி...இதைக்கொண்டு மாசக்கணக்கில் சர்வைவ் ஆகலாம்...இனிமே கொண்டாட்டம் தான்.

                போட்ரா BGM அ...
             
       எங்கள் வீட்டில் எல்லா நாளும் கார்த்திகை....லா ல லா...

- பாஸ்...இப்புடி ஜாலியா பாட்டுப்பாட இது ஒன்னும் விக்ரமன் படம்  இல்ல... இட்ஸ் எ சர்வைவல் க்ரவுண்ட் யு நோ?
- சோ இப்ப தென்னிந்திய சினிமா வழக்கப்படி இப்ப வில்லன் என்ட்ரி ஆவனுமா இல்லையா?

  -  செழிப்பான மகிழ்மதி காலகேயர்கள் கண்ணில் பட்டால்???
              தாக்குங்கள்....

                 எப்புடி சார் இந்த தாக்குதலிலிருந்து தப்பிக்கிறது?
                       

                  - why டென்சன்? கூப்புட்ரா கட்டப்பாவ...தூக்குங்கடா ஈட்டிய.



             ஒவ்வொரு இலைக்கும் பாதுகாப்பாக குத்தீட்டிக்காவலாளி.


             செடியே இலையாய் ... உடல் முழுதும் குத்தீட்டிகள் .




            பதுக்கி வைத்த பணத்தைக்காக்க கண்ணாடி பதித்த காம்பவுண்டு.


 ஒவ்வொருத்தனும, ஒவ்வொரு இலைக்கும் குத்தீட்டிக்காவலாளி போட்டு கஷ்ட்டப்பட்டு வாழ்ந்துட்டு  இருக்கானுங்க, ஆனா இந்த ரேடியோ பூ செடி, எருக்கஞ்செடி எல்லாத்தையும் பாருங்களேன். எவ்வளவு தைரியமா பாதுகாப்பு ஏதுமின்றி பப்பரக்கான்னு நிக்கிதுங்க.

                        காலகேயர்களே...தாக்குங்கள்.

         இதுகளைத் தின்னா ஆட்டுக்கு ஆப்பு தான் .


        ஏன்னா இதுக ஒடம்பு பூரா விஷம் . நரம்புகள் எங்கும் விஷம்தனை ஓடவிடுதல் ஒரு சர்வைவல் உத்தி.

         இப்படி விஷமாய் விளைதல் ஒரு உத்தியென்றால். எதிரிகள் விரும்பாச் சுவைகொண்டு பாலையிலே ஆடுகள் தீண்டா வண்ணம் வளர்தல் மற்றுமொரு உத்தி.

எடுத்துக்காட்டு - ஆடுதீண்டாப்பாளை .

         இவ்வாறு ஆடுகள் தீண்டா வண்ணம், பூச்சிகள் தீண்டா வண்ணம், கிருமிகள் தாக்கா வண்ணம் என பல ரீதியில் பலவாறாக பரிணமித்துள்ளன இத்தாவரங்கள்.

        இவற்றின் இக்குணங்களை மருத்துவத்திற்கு பயன்படுத்த ஆரம்பித்தனர் நம் மக்கள். இவற்றின் பயன்களைக்கண்டு இத்தாவரங்களை, அனைத்திற்கும் மூலமாகிய இறைவனின் ஈகையென கொண்டாடி ‘மூலிகை’ என்றழைத்தனர்.
---------------------------------------------
       பாலையிலே... ஒன்னு எதிரிகள் கண்ணில் சிக்காதவாறு தரையோட தரையா...மட்டையா மடிஞ்சுர்றானுங்க...இல்ல குத்தீட்டியாவோ வெசப்பயல்களாவோ சிறு உயரச்செடியாக வாழ்றானுங்க.

       ஏன்? இங்க கொஞ்சம் ஒசரமா, மரமா’ல்லாம் வளர முடியாதா?

-பாஸ், நீங்க ஒன்ன வசதியா மறந்துட்டீங்க. இத்தாவரங்களை இயக்குவது ‘ உயிர் பிழைத்தலுக்கான உந்துதல்’ எனும் ஆற்றல்மிகு விதி. அது அவ்ளோ சீக்கிரம் சேட்டிஸ்ஃபை ஆகாது.

       பாலையிலே வளர்ச்சி மெதுவாகத்தான் இருக்கும்...ஆனால் சீராக இருக்கும்.

       ஸ்லோ அண்ட் ஸ்டெடி வின்ஸ் த ரேஸ்க்கு எடுத்துக்காட்டு பாத்துருக்கீங்களா?

       -சுள்ளிகள் நிறை பாலையிலே மரமென வளர்ந்திருக்கும் இச்சதுரக்கள்ளியைப் பாருங்கள் கோப்பால்ல்...


     இக்கள்ளியின் * உயரம் எத்தகையது என்றுணர்த்த 'வெண்ணவெட்டி' ஒருத்தன comparisonனுக்காக கீழ நிக்க வச்சு போட்டோ எடுத்துருக்கேன் பாத்துக்குங்க.


     ஒவ்வொருமுறையும் மழை நீர் இங்கு எட்டிப்பார்க்கையில்... சிதறுதேங்காய் சேகரிக்கும் சிறுவனின் அவசரத்தோடும் துல்லியத்தோடும் நீரை  சேகரித்து, சிறிது சிறிதாய் ஒவ்வொரு வருடமும் வளர்ந்து, இது இவ்வளவு உயரம் அடைய எவ்வளவு ஆண்டுகள் எடுத்திருக்கும் என்பதை உங்கள் ஊகத்திகே விட்டுவிடுகின்றேன்.

(*பால் தரும் எதுவும் கள்ளியில் சேராது,சப்பாத்திக்கள்ளியில பால் வராது பாத்துருக்கீங்களா ? )
      -----------------------------------------------
     பாலையிலே சிலர் இவ்வுயரத்தை விரைவிலே எட்டிவிடுவதுண்டு.

யார்ரா அவன் இந்த வெயில்லயும் தில்லா பனமர ஒசரத்துக்கு வளர்ரவன்’ன்னு தானே கேக்குறீங்க?

- பில்குல் சஹி ஜவாப். பனமரமேதான்.
உயரமாய் வளர்வதில் அப்படியென்ன சவுகர்யம்? ஏன் கஷ்டப்பட்டு ஒசரமா வளரனும்?

- காரணம் சிம்பிள்.

- காலகேயர்கள் தொல்லை உயரத்தில் இருப்பதில்லை


    இளமையில் கடிவாங்கினாலும் தாக்குப்பிடித்து விரைவாக இலைகளை பாதுகாப்பான உயரத்திற்கு கொண்டுசென்று விட்டால் காலம் முழுவதும் ஜாலிதான்.

    உங்களுக்கு ஒன்னு தெரியுமா? இப்பனை ரீசன்ட்டாக பாலைக்கென பரிணமித்த ஒருவித்திலை தாவரவாசி. அதாவது இது புற்களின் தமையன்.

    மத்தபடி ரெகுலர் இருவித்திலை மரங்களும் பாலைக்கென பரிணமித்துள்ளனர்.

    மருத நில மரங்கள் போல விண்ணை எட்டுமளவு கூராக வளரவேண்டிய அவசியம் பாலை மரங்களுக்கு இல்லை.காரணம் அபரிமிதமாய் கிடக்கும் போட்டியற்ற நிலப்பரப்பு.

    ஆளில்லா பேருந்தின் மூணுசீட்டிலே பரப்பிக்கிட்டு உட்காருபவன் போல ஒவ்வொரு இலையிலும் வெளிச்சம் பட வசதியாக பரப்பிக்கிட்டு வளரும் தன்மையன பாலையின் மரங்கள்.



சரி...அப்படிப்பட்ட பாலை நிலத்து கள்ளிக்காட்டு இதிகாசத்தையும் சுள்ளிக்காட்டின் பரிபாஷையையும் களத்தில் இறங்கி ஆராய்வோமா?
--------------------------------------
சுரம் கொண்ட பூமி ஒரு பக்கம்... என்கிட்டே நெருங்குனா , உன்ன கத்தியால குத்தி, ஈட்டியால கீரி, விஷத்தால சாவடிச்சு மர்டர் பண்ணிருவண்டா டோங்க்ரேல்’ன்னு  டெரர் காட்டும் பாலையின் தாவரங்கள் மறுபக்கம்....

     இப்படிப்பட்ட ஒரு  ரத்த பூமியில யாரு சார் வாழுவான்?

         அப்புடியெல்லாம் அவசரப்பட்டு முடிவெடுக்கப்படாது.

     ரத்தபூமியிலும் சித்தம் கலங்காமல் வாழும் கைப்புள்ளைகள் இருக்கும் தேசமல்லவா நம் தேசம்.


    ஆதி காலம்தொட்டே தாவரங்களும் மற்றேனைய உயிர்களும் ஒண்ணா மண்ணா பரிணமிச்சு வந்தவுங்க. அவ்வளவு சீக்கிறம் சொந்தம் விட்டுப்போயிருமா என்ன? வாங்க ப்ரன்ச்... மழையே பலமாதங்களுக்கு கண்ணுல பாக்காத  ஒரு பாலை நிலைத்த சும்மா சுத்தி பாத்து  அங்கு உள்ள கைப்புள்ளகள  தேடிப்பிடிப்போம் .


பட்டுப்போன தாவரங்கள் நிறைந்த பாலை பூமி



பட்டுப்போய் உயிர்விட்டுப்போன முட்செடிகள் 


ஆத்தி ... எம்மாம் பெரிய முள்ளு !


எதுக்காக இவ்ளோ பெரிய முள்ளு ? இலையை  பாதுகாக்கத்தானே ?


அப்ப இலைகள் எங்கே ?

இதோ இங்கே !

முட்களின் பாதுகாப்பில் பத்திரமாய் இலைகள் 


 

அளவில் சிறிய இலைகளால் நீரிழப்பைக்குறைத்து , அளவில் பெரிய முட்களால் காத்துக்கொள்ளும் யுக்தி .
சரி கள்ளிகளும் சுள்ளிகளும் சூழ்ந்துள்ள இந்த ரத்த பூமியில்  வசிக்கும் கைப்புள்ளைகள் எங்கே ?

                        இதோ முதல் கைபுள்ளை.


ஒடக்காய் கள்ளியத் தின்னாது. அப்புறம் ஏன் இங்க குத்த வச்சிட்டு இருக்கு?

இதோ அருகிலேயே ஒரு கள்ளி மலர் 

            முள்சூழ் இக்கள்ளி யாருக்கென பூத்திருக்கு?

            வாங்க பூவுக்குள்ள பூந்து பாப்போம்.



         அடிக்கள்ளி(!) உன் பூவுக்குள்ள இத்தனை நெக்டார் நக்கிகளா?

         சோலைகளில் கிட்டும் நெக்டார் அதே சுவை சற்றும் குறையாமல் பாலையில் கிட்டினால் கூட்டம் சும்மா அம்முமல்லவா





       பூவு...உள்ள நெக்டார் நக்கிப் பூச்சிகள்... வெளிய ஒடக்காய்...ஒடக்காய்க்கு வல்லிய ஊறு  விளைவிக்கவல்ல வல்லூறு ... 
                              

          இதோ  பாலையின் உயிர்ச்சூழல்.


             வேற யார்லாம் இங்க இருக்கா?


இந்த பெருமாள் பூச்சியின் முட்டையை பாருங்களேன் ... இவற்றிற்கு வெயில் ஒரு பொருட்டாய் தெரிவதில்லை போலும் அதான் வெட்ட வெளியிலே காய்ந்து கொண்டிருக்கிறது ... ஆனால் அனைவராலும்  வெயிலை தாங்கிக்ககொள்ள இயலாது தானே ?

                         அப்ப என்ன பண்ணலாம் ?

              -சுத்தி இது மாதிரி கவர் பண்ணிக்கலாம் 

கவர் பண்ண இயலாதவர்கள் ? 

குளுகுளு வீட்டை கட்டிக்கொள்ள வேண்டியது தான் 
குளுகுளு கரையான் புற்று 



இது எதுவுமே முடியலப்பா  , வேறு என்னதான்  தீர்வு ? 

-வேறு வழியில்லை ...வெயிலிலிருந்து தப்பிக்க நிழலை நாட வேண்டியதுதான்   -  இந்த வெயிலுக்கு,  நிழலும் ஈரமும் இருக்கும் இடங்கள் நிச்சயம் பலரை வசீகரிக்கும். அப்படிப்பட்ட இடம் தான் மரத்தின் பொந்துகளும் சந்துகளும்...


 இதோ பொந்துக்குள்ள பாம்பு..

                      பொந்துக்குள்ள இரயில் பூச்சி...


                                   சந்துக்குள்ள கூடு


       இந்த சந்துகள்லயே சூப்பரான சந்து, பனைமர இலைப் பட்டைகளுக்கு இடையே உள்ள சந்துதான்.
சந்துக்குள் அடைக்கலம் தேடி ஒரு பயணம் 

இந்த சந்துல அளவான ஈரமும் பதமான செத்தைகளும் இருக்குது. இங்கே கொஞ்சமா உரம் போட்டு விதை நட்டு வச்சா சூப்பரா வளரும் தெரியுமா?

யாரு பாஸ் இங்க உரம் போட்டு விதை நட்டு மரம் வளக்குறது?

- நம்மைப்போன்ற மனிதப்பதர்கள் சுடுசோம்பேரிகள் என்பதை இயற்கை அறிந்தே வைத்துள்ளது. யாருக்கு என்ன குடுத்தா என்ன வேலை செய்வார்கள் என்பதையும் தெளிவாக அறிந்து வைத்துள்ளது இயற்கை.அதுனால விதை போட்டு மரம் வளர்க்க வேறு ஒரு ஆளை அது நியமித்து உள்ளது 


பாத்ரூம் போகும் பறவை 
    பாலையிலும் கிட்டக்கூடி வேப்பம்பழம் , ஆலமரத்துப்பழம் மற்றும்  அரச மரத்துப்பழம் ஆகியவற்றைத் தின்னும் இக்குருவிகள் பனைப் பட்டை சந்துல பாத்ரூம் போனா என்ன ஆவும் ???

விதை + ஆய்/உரம் + ஈரம் = செடி....இதைப்பற்றி மேலும் அறிய 

             பொந்துகளும் சந்துகளும் சிந்துபாடுவதற்கு ஏற்ற இடமென்பதில் ஐயமேதும் இல்லை. ஆனால் எல்லோருக்கும் அவை கிட்டுவதில்லை. அதனால் பல பாலைவாசிகள்  ப்ளாட்பாரவாசிகளாகும் நிலைக்கு தள்ளப்பட்டு விட்டார்கள். அவர்கள் தான் ground dwellers எனப்படும் தரை வாசிகள். 
ground dwelling thick knee

      இவைகளுக்கு பல்லி பாம்புங்க தான் ப்ரதான உணவு.


                பல்லி பாம்பு’ல்லாம் இங்க அபரிமிதம்.

 ஏன்னா பல்லி பாம்பு எல்லாம் குளிர் இரத்தப்பிராணிகள்’ங்குறதால தகிக்கும் வெயிலுக்கு வியர்வை சிந்தி உடல்சூட்டை நிலையாய் வைக்கவேண்டிய அவசியம் இல்லாதவை. உதாரணத்திற்கு இந்த பல்லிய பாருங்களேன்... பங்குனி வெயிலு பல்லக்காட்டிக்கிட்டு இருக்கு ... அதை சற்றும் சட்டை செய்யாமல் இது தனது துணைக்கு அழைப்பு விடுத்துக்கிட்டு இருக்கு.



           வெப்பத்தை தவிற்க எளிதான யுக்தி... இரவாடுதல்.

இரவாடி

       இரவாடவும் முடியல, வெயிலாடவும் முடியலன்னா என்ன பண்றது? மழை வர்ர வரைக்கும் மட்டையாயிர வேண்டியது தான்.
மழை வரும் வரை நீள் உறக்கக்கத்திலிருக்கும் நத்தை 



       ஆனால் இந்த உத்திகள் ஏதும் கைக்கொள்ளாமல் வெப்ப இரத்தப்பிராணிகள் கடும் பிரயாசத்தின் பேரிலே இங்கே வசிக்கின்றன.

         இந்த இடம் பாலை என்று நம்மால் அழைக்கப்பட்டாலும், இது தார் பாலைவனம் போல நீரே காணாத பிரதேசமல்ல. இது அதுக்கும் கொஞ்சம் கீழே... அதாவது நீர்குறைவான பிரதேசம். அதனால் ஒரிஜினல் பாலைவாசியான ஒட்டகம் போல இங்கே வாழும் வெப்ப இரத்தப்பிராணிகளுக்கு உடலளவில் தகவமைப்பு செய்துகொள்ள வேண்டிய அவசியம் ஏதும் ஏற்படவில்லை. 

      அப்ப ஒரு இடத்துல பலகாலத்திற்கு மழையே இல்லா பஞ்சம் ஒன்னு வந்தாஇங்க இருக்க வெப்ப இரத்த பிராணிகள் எல்லாம் என்ன பண்ணும் ?


          - அங்கேருந்து பொட்டிய கட்டிட்டு கெளம்பிற வேண்டியது தான்!!!
      உயிர் பிழைக்க இவை இப்படி பொட்டிய கட்டிட்டு கெளம்புற யுக்திக்கு பெயர் ... “ நீருக்கு வேறு  ஊருக்கு செல்லல்’ அதாவது migration.

புள்ளி ராணி !
                  இந்த மான நான் ஃபோட்டா புடிச்சது ஒரு பாலை நில சரணாலயம் ஒன்றில். அத சுத்தி உள்ள ஏரியாவெல்லாம் மனிதர்களால் ஆக்ரமிக்கப்படுவிட்டன. 

      நாம ஏற்கனவே பாத்த மாதிரி இந்த மான்களெல்லாம்  அந்த இடத்தில் மட்டும் வாழ் நாள் எல்லாம் குத்தவச்சு வாழப் பழகவில்லை. இப்ப ஒரு கடும் கோடை வருதுன்னு வச்சுக்குங்க... அவற்றின் உள்ளுர்வின் படி அவை நீர் இருக்கும் திசை நோக்கி மைகிரேட் ஆக ஆரம்பிக்கும்.


              ஆனா அங்கதான் ட்விஸ்ட்டு... நாம தான் காட்டுக்கு வெளிய ரோடு போட்டு வச்சுருக்கோம், வீடு கட்டி வச்சுருக்கோம், வேகவேகமா காரு ஓட்டிக்கிட்டு போவோம், தெருநாயெல்லாம் சுத்தும்.

   இப்ப பாத்தீங்கன்னா சார்...காட்டுக்குள்ள இருந்தாலும் சாவு... காட்டுக்கு வெளிய வந்தாலும் சாவு.
   கார் இடிச்சு செத்த கர்ப்பிணி மான்ல இருந்து, நாய் கடிச்சு செத்த கெடா மான் வரைக்கும் வெரைட்டியான மான் சாவ எல்லாம் நாங்க பாத்துருக்கோம்.


.
       அய்யய்யோ... இப்புடியே போனா இதுங்களோட நெலம???

    விடுங்க பாஸ்...அதுங்க இருந்தா என்ன? செத்தா நமக்கென்ன? பிக்பாஸ்ல ஓவியா படாத கஷ்டத்தையா இதுங்க பட்டுருச்சுங்க?
  
 ஆனா ஒருவிஷயம் மட்டும் என்னால் அறுதியிட்டுக்கூற முடியும், உயிர்ச்சங்கிலியின் கண்ணிகள் எளிதில் அறுபடக்கூடியவையே. அவற்றை அறுப்பதும் எளிதானதே. இயற்கையை இவ்வாறு எளிதாக நம்மால் தாக்கிவிட முடியும். ஆனால் அதன் எதிர்த்தாக்குதல் மிக மூர்க்கமாய் இருக்கும். இதோ இப்போது நீங்கள் வருடாவருடம் அனுபவிக்கும் வெயிலைப்போல :) 

----------------------------------------


 பாலைவாசிகள் எப்படிப்பாலையை தாக்குபிடித்து வாழ்கை நடத்துறாய்ங்கன்னு பாத்தோம். 

          சரி, இப்ப ஒரு சிச்சுவேசன் சொல்றேன், கற்பனைப் பண்ணி பாருங்க. வறட்சி இன்னும் தீவிரமாகுது, அப்படிப்பட்ட சூழலில் சொட்டு நீரைக்கூட இந்நிலம் பார்க்காமல் இருந்தால், நாம் பார்த்த இதே தாவரங்கள், உதாரணத்திற்கு முள் நிறைந்த நாட்டுக்கருவேல மரத்த எடுத்துக்குவோம், அது எப்படி இந்நிலதிற்கு ஏற்ப தகவமைப்பு கொள்ளும்?

     - நிச்சயம் நீரைத்தேடி வேரானது மிக ஆழமாய் ஊடுருவும்.
         - முட்கள்?  இன்னும் அதிக நீளமாய் ஆகும்.
      - இலைகள்?  இன்னும் சிறுத்து, நீர் இழப்பை குறைக்க முயலும். 

             நாம  கெஸ் பண்ணதெல்லாம் சரியான்னு பாக்க, மெக்சிக்கோவின் பாலைவனத்துக்கு ஏற்ப பரிணமித்த  கருவேலவாசி ஒருவனைக் காண்போமா?

நம்ம ஊர் செடியும் / மெக்சிக்கோ செடியும் 

    அடடே! நாம் எண்ணியதற்கு மாறாக அளவான முள். பெரிய இலைகள்!!

       அய்யய்யோ ! இந்த பாதுகாப்பு பத்தாதேப்பா ?

  கவலப்படாதீங்க இந்த இலைகள மேய்வன தீண்டாது... அப்படிப்பட்ட tannin கலவை
இதன் இலைகளுக்குள் உள்ளது.

    அதெல்லாம் சரி, இது எப்புடி அந்த பாலையிலும் இவ்ளோ பசுமையா? அப்புடி என்ன
பெசல் ஐட்டம் அதுகிட்ட இருக்கு?

        - உலகிலேயே அதிக ஆழம் செல்லக்கூடிய வேர் இதுகிட்ட இருக்கு. சுருங்க சொல்லனும்னா நிலத்தடி நீர் எவ்ளோ ஆழத்துல இருந்தாலும் ஸ்ட்ரா போட்டு உறிஞ்சிடும்.

                ஆஹா! இப்படிப்பட்ட ஒரு தாவரத்தத் தான் இவ்ளோ நாள் தேடிகிட்டு இருந்தேன்.
இத நம்மூர் வரண்ட காடுகளில் வளத்தா பாலையெல்லாம் சோலை ஆயிரும்ல?


   இதேதான் நம்ம  நாட்டோட அந்த கால ஆட்சியாளர்களுக்கும் தோன்றியிருக்க வேண்டும்.அதனால் தான் இதன் விதைகள நாடு முழுதும் தூவிவிட்டனர். 

  - இது வேற யாரும் இல்ல. நம்ம சீமைக்கருவேல மரம் தான்.

    சீமக்கருவையா? டாய்ய்ய்ய்ய்...வெட்ரா அத... அத குத்திக் கொடல உருவுங்கடா... ட்ட்டாஆஆஆய்ய்ய்...


           பொறும...பொறும... இது நல்லதா? கெட்டதா? மெய்ப்பொருள் என்னன்னு தெரியாம 
ஒருத்தன குத்தம் சொமத்தலாமா?

   மொதல்ல இதோட பலன்கள் என்னன்னு பாக்கலாம்.

- இது ஒரு தாவரம், அதுனால இது கட்டாயமா ஒரு ஆக்ஸிஜன் வழங்கி.
- இது ஒரு நல்லfire wood அதாவது  இது நல்ல எரிபொருள்.
- இதன் காய்கள் புரதம் மிகுந்தவை. ஆட்டுக்கு தீவனமாய் வழங்களாம்.
- நம்மூர் பாலைவாசிகளைவிட வெயில் தாக்கத்திலும் செழித்து வளரும் தன்மை.

             இதோ இந்த நிலத்தை நோக்குங்களேன். நம்மூர் பாலைவாசிகள் வெயிலுக்கு டக் அவுட் ஆகி பட்டுப்போய் இருக்க, இவன் மட்டும் பசுமையாக நிக்கிறான்.




            சரி பசுமையா இருக்கு தான்...இங்கே  இவன் பிழைத்தால் மட்டும் போதுமா?

             இந்நிலத்திற்கும், இங்குள்ள தாவரங்களுக்கு ஏற்ப பரிணமித்து வந்த உயிர்சூழல் இவன் வருகையினால் நன்மை அடைந்துள்ளனவா இல்லை பின்னடைவு கண்டுள்ளனவா?
வாங்க நோக்கலாம்.

  இந்த மாடுகளுக்கு இவற்றின் தண்டுச்சாறை உறிதலில் தடையேதுமில்லை.அவற்றை  எறும்புகளுக்கும் இவற்றால் பாதிப்பேதும் இல்லை 


மாடு மேய்க்கும் எறும்பு 

        தயிர்சிலுப்பிகளும் இங்கே முட்டை இடத்தயங்கவில்லை




           தரை வாசிகளுக்கும்  இவற்றால் எவ்வித பாதிப்பும் இருப்பதாய் தெரியவில்லை  . இதோ இந்த  மயில்கள் கூட முட்களின் அரவணைப்பில் அமைதியாகவே உள்ளன.
----------------------------------------------------------------------------------------------------------------------
 பல்லுயிர் பிழைத்தோங்கிய தமிழகத்தின் பல வறண்ட பகுதிகளில் தற்போது சீமைக்கருவேலம் மட்டுமே எஞ்சியிருக்கும் அவல  நிலை காணக்கிட்டுகிறது .
    இது போல சீமைக்கருவேலம் மட்டுமே ஆக்ரமிக்கும் பகுதிகளில் என்ன நேரலாம்?


    தார்ன் ஹாப்பர்களும் தரை வாசிகளும் இங்கே தப்பிப்பிழைக்கக்கூடும், ஆனால்  பொந்துவாசிகளுக்கு இங்கே நிச்சயமாய் இடமில்லை. அவற்றை சார்திருக்கும் வேட்டையாடிகளுக்கும் இது ஒரு இழப்புதான்.


         நற்செய்தி கூறா அடியாளைக் கொல்லும் ஆண்டனிபோல் இயற்கையானது மாற்றத்திற்கு
தகவமையாத இவ்வுயிர்களுக்கு கருணையேதும் காட்டப்போவதில்லை . 

          மாற்றத்திற்கு தகவமையாத எந்த உயிரும் அழிய வேண்டியது தான்.

       அழியாமல் இருக்க என்ன செய்ய  வேண்டும் ?


       -இச்சூழலுக்குப் பழகித்தான் ஆக வேண்டும். இதோ இக்கிளிகளைப்போல.


             இதுலேருந்து என்ன தெரியுதுன்னா...நாம் உருவாக்கிய இச்செயற்கை மாற்றத்திற்கு தாக்குப்பிடித்தால்தான் இம்மண் சார் உயிர்களால் இச்சூழலில் தப்பமுடியும். 

 அதுல என்ன ப்யூட்டின்னு பாத்தீங்கன்னா...இந்த தாக்குப்புடிக்க வேண்டிய உயிரினங்கள் லிஸ்ட்ல நாமளும் இருக்கோம் :) 
 கண்ணுக்கு தெளிவாக தெரியும் இம்மாற்றங்களைத் தவிற, இவற்றால் உறிஞ்சப்படும் நிலத்தடி நீரின் அளவு குறைதலால், சூழியல் எந்த அளவு பாதிக்கப்படுகிறது என்பதை அறிய நீண்டகால ஆய்வு நடத்துதல் அவசியம்.
--------------------------------------

         நம்ம களஆய்வு நடத்துன இதே பாலைபூமில சீமைக்கருவேலனுக்கு சவால் விடும்
வகையில் சில பசுமைமாறா   மரங்கள் இருந்துச்சு.

 
   இது பேரு நுணா மரம்.( நோனி சிரப் இதுலேருந்து தான் எடுக்குறாங்க)




                            
           இந்த ஒரு மரத்த மட்டும் நோக்குவோமா?


     இங்க பாருங்களேன் ...இதன் இலை ஒன்றில் வீவர் எறும்பும்பு போல் வேடமிட்டுள்ள ஒரு சிலந்தி.


   இவன்  ஏன் வீவர் எறும்பு போல் வேடமிடவேண்டும்?’

            ஏன்னா இது வீவர் எறும்பின் ஃபேவரைட் மரம்.வீவர் தானேன்னு  நெருங்கும் பூச்சிகள் இதுக்கு இரையாக வேண்டியது தான் 
இலைகளை வளைத்து கூடு கட்டும் வீவர் எறும்புகள் 

           இரவாடி வவ்வால்களுக்கு இதன் பழங்கள் தான் பிடித்தமான இரவு டின்னர் டிபன்.

             இது மட்டுமா? இதன் பூக்கள் முல்லைக்கு சவால் விடும் பாலையின் நெக்டார் மற்றும் பழம் வழங்கிகள்.







    இதன் பழத்தில் மட்டுமே பிறந்து வளரக்கூடிய ஸ்பெஷல்  ஈ ஒன்றும்  உள்ளது.


     இதே போல் பல பாலைவாழ் தாவர  உள்ளனர்.
     எ கா ...பாலை (Manilkara hexandra),வெப்பாலை.
------------------------------------------------------------------------------------


         நுணா, பாலை, வெப்பாலை போன்ற  நமது பாலை நிலத்திற்கென பரிணமித்த மரங்கள் சீமை கருவேல மரங்கள் இருக்குமிடங்களிலெல்லாம் பாலை நிலத்தில் விரவியிருப்பதாக யோசித்துப்பாருங்களேன். 

  அத்தகைய நிலப்பரப்பின்  உயிர்ச்சூழல் எப்படி இருக்கும்?


   சரி அதெல்லாத்தையும் விடுங்க...இந்த நிலத்தில் எடுக்கப்பட்ட இந்த ஒரு படத்தை பாருங்களேன்.

 நாம் பதிவின் ஆரம்பத்தில் பார்த்தோமே பற்றிப்படரும் கொடி...அப்படிப்பட்ட கொடி  ஒன்றின் எச்சம், பட்ட இம்மரத்தின் மேல் படர்ந்துள்ளது.
  இது நமக்கு உணர்த்துவது என்ன?

  இப்பாலையிலும் இவை செழித்து வளருமளவிற்கு முன்பு ஒரு காலத்தில்மழையானது பெய்திருக்க வேண்டும்.

         சரி அப்படி ஒரு மழை இப்பாலையில் மறுபடி பெய்தால்?

                         வாங்க காத்திருப்போம்.
----------------------------------------------------------------------------------
                      சில மாதங்களுக்குப்பிற்கு...ஒரு சிறிய மழைக்கு  பிந்தைய அதே பாலை நிலம்..... 


                       
        பட்டுவிட்டென நாம் கருதிய மரங்களின் தற்போதைய தோற்றம்.








நத்தையின் உறக்கம் திறக்கும் அளவிற்கு நீர் இன்னும் வரவில்லை 

எப்போதும் பசுமை மாறா நுணா மரம் 


          இம்மழை, படரும்கொடிகள் பரவுமளவிற்கு நீர் வழங்கவில்லை. என்றாலும் இங்கே
பாலைக்கென தகவமைந்த தாவரங்கள் எத்தகைய வித்யாசம் காட்டுகின்றன என்பதை கண்டோம்

  இவை நமக்கு உணர்த்துவது ஒன்றே ஒன்றைத்தான்.

  தாவரங்கள் பிழைத்திருக்க தேவை தண்ணீர் அல்ல “ ஈரம் “.


      கருவேலம் மரங்களைப்போல, கள்ளிகள் தம் வேரை ஆழப்பாய்ச்சுவதில்லை, எனினும் அவை எங்கணம் பாலையில் பிழைத்திருக்கின்றன?
வேரை  ஆழப்பாய்ச்சா கள்ளிகள் !

 பல்லிகள் எங்கும் நீர் தேடி அலைவதில்லை எனினும் அவை எங்கணம் பாலையில் பிழைத்திருக்கின்றன?

                                    இதுக்கு விடையும் மேல சொன்ன அதே "ஈரம்" தான் .
                                    
        அவை எப்படி அந்த ஈரத்தை பெறுகின்றன ????


                          பதிவு நெம்ப லெந்தா போவதால இத்தோட முடிச்சுக்குவோம்.

Thanks Lee Quwan and Prakash sir

1 comment:

  1. என்ன ஒரு கவன ஈர்ப்பு...!

    ஒவ்வொன்றையும் பற்றி படத்துடன் விளக்கங்கள்...

    அற்புதம்... தொடர வாழ்த்துகள்...

    ReplyDelete

டாக்டருக்கே ஊசியா ? சரி குத்துங்க ...

Related Posts Plugin for WordPress, Blogger...